Ku wa Gatandatu tariki 23 Ugushyingo 2024 saa munani n'iminota mirongo itatu kuri stade King Power ikipe ya Leicester city izakira Chelsea FC mu mukino w'umunsi wa 12 wa Shampiyona y'ikiciro cya mbere y'u Bwongereza. Uyu mukino ntago uzagaragaramo Kapiteni wa Chelsea Reece James kubera ikibazo cy'imvune yagize.

Reece James yongeye kugira ikibazo cy'imvune kizatuma atagaragara ku mukino wa Shampiyona Chelsea izasuramo Leicester city ku wa Gatandatu 

Umutoza wa Chelsea Enzo Maresca yatangaje ko Kapiteni w' ikipe atoza Reece James yongeye kugira ikibazo cy'imvune ikazatuma adakina umukino ikipe ya Chelsea izasuramo Leicester city muri Shampiyona kuri uyu wa Gatandatu. Mu magambo ye Enzo Maresca avuga ku mvune ya Reece James yagize ati" nzi ko bitoroshye ariko buri gihe iyo agize ikibazo cy'imvune biramugora cyane kuri njye bikaba akarusho." Yakomeje agira ati" Agomba kubyemera no kugerageza kwirinda uko ashoboye. Rimwe na rimwe ibintu bibaho nubwo Uba ushaka kubyirinda. Twizere ko ashobora kuboneka mu mukino ukurikira."

Umutoza wa Chelsea yatangaje ko Kapiteni Reece James yongeye kugira ikibazo cy'imvune 

Uyu mukinnyi ukina inyuma ku ruhande rw'iburyo afite impano yo gukina umupira w'amaguru ariko ntago ahirwa nawo kuko akunze kugarizwa n'ikibazo cy'imvune cyane nk'ubu kuva yaba Kapiteni wa Chelsea yayikiniye imikino 15 maze asiba imikino 49 kubera ikibazo cy'imvune hanyuma mu mwaka ushize w'imikino wa 2023-2024 yakiniye Chelsea imikino 10 gusa byaje no gutuma amara iminsi 271 ari hanze y'ikibuga ninako kandi muri rusange kuva yagera muri Chelsea 2019 amaze iminsi 682 ari hanze y'ikibuga (adakina) kubera ikibazo cy'imvune byanatumye asiba imikino 129 bitewe n' imvune 20 yagize zitandukanye.

Reece James kuva yagera muri Chelsea muri 2019 amaze gusiba imikino 129 kubera ibibazo by'imvune bigera kuri 20 bitandukanye 

Reece James w'imyaka 24 yageze muri Chelsea avuye mu irerero ryayo muri 2019  kuva icyo gihe amaze kuyikinira imikino 138 atsindamo  ibitego 11 atanga imipira 18 yavuyemo ibitego kuri bagenzi be. Yatwaranye nayo igikombe cya UEFA champions league muri 2021 ndetse n'igikombe cya UEFA super cup muri 2021-2022. Amaze gukinira Kandi ekipe y'igihugu y'Abongereza imikino 7 nta gitego arayitsindira ariko amaze gutanga imipira 2 ivamo ibitego kuri bagenzi be.