Kuri uyu wa Kane wa tariki 19 Ukuboza 2024 mu masaha ya saa yine za mu gitondo nibwo ikipe y'igihugu y'u Rwanda Amavubi y'abakinnyi bakina imbere mu gihugu yafashe rutemikirere ivuye ku kibuga cy'indege cya Kigali i Kanombe yerekeza ku kibuga cy'indege cy'Addis Ababa muri Ethiopia mu rwego rwo kugira ngo barekeze mu mujyi wa Juba mu gihugu cya Sudani y'Amajyepfo nyuma yo guca muri Ethiopia mu masaha y'umugoroba nibwo ikipe y'igihugu y'u Rwanda Amavubi yasesekaye i Juba aho agiye gukina umukino ubanza n'igihugu cya Sudani y'Amajyepfo mu mikino y'ijonjora rya nyuma mu gushaka itike yo gukina imikino ya CHAN.

Ikipe y'igihugu y'u Rwanda Amavubi y'abakinnyi bakina imbere mu gihugu yahagurutse ari abakinnyi 25 barimo abanyezamu 3: Hakizimana Adolphe, Muhawenayo Gad na Habineza Fils Francois. Barimo bamyugariro 8: Byiringiro Jilbert, Serumogo Ally Omar, Bugingo Hakim, Niyomugabo Claude, Nsabimana Amiable, Niyigena Clement, Buregeya Prince na Nshimiyimana Yunusu wongeye kugarurwa mw'ikipe nyuma yuko yabanje gusezererwa akaba yaragaruwe aje gusimbura Emery Bayisenge wagize ikibazo cy'imvune. Barimo abakina hagati mu kibuga 6: Muhire Kevin, Niyibizi Ramadhan, Ngabonziza Pacifique, Ruboneka Jean Bosco, Kanamugire Rogers ndetse na Ntirushwa Aime. Hakaza abataha izamu 8: Mugisha Jilbert, Tuyisenge Arsene, Iraguha Hadji, Mbonyumwami Taiba, Dushimimana Olivier, Nizeyima Mubarakh, Harerimana Abdallaziz, Mugisha Didier. Bagomba gutozwa na Jimmy Mulisa wasigariyeho umutoza mukuru Frank Trosten Spitler wasubiye iwabo mu Budage kubera ibibazo by'umuryango azungirizwa na Habimana Sostene Lumumba asanzwe atoza ikipe ya Musanze Fc bazafatanya Kandi na Mugisha Alex nk'umutoza w'abanyezamu.

Biteganyijwe ko ikipe y'igihugu ya Sudani y'Amajyepfo izakira Amavubi y'u Rwanda mu mukino ubanza kuri icyi cyumweru tariki 22 Ukuboza 2024 saa cyenda z'amanywa kuri National Juba Stadium. Nyuma y'iminsi itandatu kuri 28 Ukuboza Amavubi nayo azakira Sudani y'Amajyepfo mu mukino wo kwishyura uzabera kuri Stade Amahoro i Remera saa kumi n'ebyiri z'umugoroba.

Ikipe y'igihugu y'u Rwanda Amavubi y'abakinnyi bakina imbere mu gihugu agiye gukina ijonjora rya nyuma mu mikino yo gushaka itike yo gukina igikombe cy'Afurika gikinwa n'abakinnyi bakina imbere mu bihugu byabo nyuma yo gusezerera ikipe y'igihugu ya Djibouti iyitsinze ibitego 3-1 mu mikino yombi. Ninako kandi ikipe y'igihugu ya Sudani y'Amajyepfo nayo igeze aha nyuma yo gusezerera ikipe y'igihugu ya Kenya nayo iyitsinze ku giteranyo cy'ibitego 3-1.